"اضحك كركر"- غباءxغباء - طاطا وريكا- الحلقة الاولي

"اضحك كركر"- غباءxغباء - طاطا وريكا- الحلقة الاولي
غباءxغباء ( طاطا وريكا ) -الحلقة الاولي

طاطا وريكا اتنين اصحاب طلعوا علي الدنيا لقوا نفسهم مع بعض وساكنين في حارة واحدة " نفس الحارة الي ساكن فيها عبد العال والمعلم فجلة بس بعيد عنهم شوية "

طاطا وريكا ساكنين في شقة واحدة في بيت الست" فتكات" وما ادراك ما الست "فتكات" هي عبارة عن " والله ما عارف اوصفها بأيه " تقدر تقول كده - بقرة حلوب – او زي المصارعين اليابانين الي لابسين فردة كوتش في وسطهم ويفضلوا ينطحوا في بعض زي الخرفان

المهم ان مفيش يوم يعدي الا ولازم تسمع صراخ الست فتكات والشتايم من الي قلبك يحبها والحارة كلها لازم تسمع بيها وهي بتشتم في طاطا وريكا بسبب الايجار مرة وبسبب عمايلهم الذكية مرة

وعلي فكرة هما عكس الست"فتكات" خالص كل واحد فيهم عامل زي"عصاية الشمسية"

طاطا وريكا اذكياء جدا لدرجة انهم مبيعمروش في اي وظيفة بيرحوها

في يوم اشتغلوا في "محل فطاطري" صاحب المحل دخل عليهم لاقاهم

بيحدفوا بعض -بالعجين- وفي يوم اشتغلوا عند <جزار> وتاني يوم المعلم علقوهم مكان اللحمة امام المحل علشان كانوا بيبعوا علي كل "كيلوا لحمة 2كيلوا هدية" ولما سالهم انتوا بيتعملوا ايه؟ قالوا له :

*احنا بنعملك دعاية للمحل

دعاية ايه دي الي تخرب البيوت بالشكل ده. وفي يوم تاني اشتغلوا عند ميكانيكي "طاطا" كان بينظف الورشة والميكانيكي كان نايم تحت السيارة بيصلحها وقال ل"ريكا" شغل الموتور يا –ريكا-

- ريكا- فرح جدا وقاله: شكرا يا اسطي انك ادتني الفرصة دي

الميكانيكي استغرب من "ريكا" ومفهمش ليه "ريكا" قاله كده المهم اخينا ركب السيارة وراح مشغل الموتور واتحرك بالسيارة بسرعة جدا

"عزيزي القارئ لو وقتك يسمح ممكن تروح تزور الميكانيكي في المستشفي . ده لو ماكنش مات طبعا"

هما دول طاطا وريكا الي فاكرين انهم اذكياء جدا . كل يوم يروحوا يدوروا علي شغل ويرجعوا آخر الليل بعدما يعملوا المصائب وعلشان الست فتكات متشفهومش وتسالهم علي الايجار وتمسكهم تضربهم كالعادة ودي مابتضربهومش دي بتنفضهم زي "السجادة" او بطئشهم في بعض زي "البيض" اصلها ستقوية ومفترية مفترية .

بيطلعوا من العمارة الي جنب العمارة بتاعت الست "فتكات" ويقفزوا من السطح بتاعها الي سطح "فتكات" وينزلوا علي طراطيف صوابعهم علشان متشفهومش "امنا الغولة" ويدخولوا الشقة بتاعتهم .لاكن طاطا وريكا مابيسبوش حقهم علطول بينتقموا منها > بس من غير ما تعرف انهم هما الي عملوا كده طبعا علشان ماتعملهومش معاملة -البيض<

يعني في مرة قطعوا حبل الغسيل بتاعها والغسيل وقع في الشارع والناس شافت حاجات كتييييييييييير اوي . ومرة تانية حطوا امام باب شقتها "قشر موز" والست "فتكات" طلعي من باب شقتها وداست علي"قشر الموز" وراحت ... يانهار اسود جبل المقطم انهااااااار ...

الناس الي قاعدين علي القهوة في الحارة لما لقوا بيت الست "فتكات" بيهتز افتكروا في زلزال في البلد خافوا وقاموا جروا من الحارة  لاكن ده مش زلزال دي الست "فتكات" - وقعت -  وادحرجت علي السلالم زي الكورة ودخلت المستشفي 3شهور بس خرجت بعد ما خفت الحمد لله... حكايات طاطا وريكا مابتخلص يوم مع فتكات ويوم مع الناس وايه تاني حنعرفوا عن "طاطا وريكا"انتظرونا في الحلقة القادمة انشاء الله...

تابعونا علي صفحتنا علي الفيس بوك///

https://www.facebook.com/pages/%D9%82%D8%B5%D8%B5-%D9%88%D8%B1%D9%88%D8%A7%D9%8A%D8%A7%D8%AA-%D9%88%D9%83%D9%85%D8%A7%D9%86-%D8%AD%D9%83%D8%A7%D9%8A%D8%A7%D8%AA/1715092155383493 

المؤلف: اسماعيل محمد

مدون ومؤلف مصري -أعشق تأليف القصص والروايات

"رعب-مغامرات-اكشن-خيال علمي"

  

تابع القراءة

"اضحك كركر" - يوميات "عبد العال"- الحلقة الاولي

"اضحك كركر" - يوميات "عبد العال"- الحلقة الاولي
"يوميات عبد العال" – الحلقة الاولي

"عبد العال" رجل في اوائل الاربعينيات بيشتغل سواق تاكسي بسيط . "عبد العال" راجل محترم مبيشربش غير السيجارة - سيجارة بس – لاكن لما تشوفه تقول عليه "مسطول" وده علشان المعلم "عبد العال" نص سنانه واقعه وكلامه نصه مش مفهوم "وبيموط" في الكلام يعني زي المساطيل بالظبط لاكن هو راجل طيب ومحبوب في الحارة الي ساكن فيها والي فيها المعلم "فجلة" الي "عبد العال" شغال علي التاكسي بتاعه

وفي يوم من ايام ربنا " عبد العال" ماشي بالتاكسي ولقي - زبون- بيشواره علي الطريق . وقف "عبدالعال" فرحان بالزوبون الي باين عليه " زبون تقيل اوي"

الراجل لابس بدلة وعلي سينجة عشرة وحاطط برفان خلت "عبد العال" اتسطل اكتر ما هو مسطول

وهما ماشين في الطريق كان الزبون بيتكلم مع اخينا "عبده" ويخش في مواضيع ويخرج من مواضيع والمعلم "عبده" كان بيقول بينه وبين نفسه

·      دا انت راجل رغاي اوي مش معني انك زبون حلو يبقي حتزهقني يعني

وفجأة الزبون وقف "عبد العال" بالتاكسي

عبد العال\ خير انشاء الله يا باشا هو فيه حاجة؟

الزبون\ آه اظاهر ان الحالة رجعتلي تاني

"عبد العال" بيقول لنفسه \

ما هو من ام الرغي بتاعك انت بالع " راديو "

المهم اخينا قال للزبون – تحب اجيبلاك شوية "مايه" يا باشا

الزبون\ لا... خد الورقة دي وخد ال100 جنيه دي وهاتي الدواء ده من الصيدلية الي هناك دي بسرعة آآآآآآآآآآآآه

"عبده" شاف الزبون بيصرخ راح نازل من التاكسي وجري علي "الصيدلية" ونسي المفاتيح في التاكسي وبسرعه اتحرك الزبون من مكانه وجلس مكان "عبد العال" وخد التاكسي وقال يا فكيك

خرج "المعلم" عبده من الصيدلية وبص ملاقاش التاكسي واتسمر في مكانه

عبد العال/ ياااااااااا يا عم يا بتاع الدواء- ياعم يالي كنت حتموت انتا

يبص شمال ويمين ومفيش حاجة

ولا التاكسي

ولا الزبون

يانهار اسووووووووووووووووووووووووووووود

التاكسي اتسرق من واحد "ميت" آه يا ابن " التيييييييييييييييييييت"

واتلمت الناس علي "اخينا عبده" الي وقع مكانه من الصدمة وقعد يقول بصوت عالي " فجلة حيموتني – فجلة حيعلقني "

وبعد ساعات دخل "عبد العال" الحارة رجل تقدم ورجل تتاخر والعرق مغرق هدومه كلها وعمال يكلم نفسه

" حعمل ايه مع المعلم فجلة- دا حيعلقني- دا عنده اربع عيال الواحد فيهم زي "الديناصور" ممكن يبلعني- ربنا يستر منك يا –فجلة"

ودخل "عبد العال" علي المعلم –فجلة- في الدكان وكان زي عادته المعلم "فجلة" بيشرب الشيشة ولما شافه اخينا قاله

·      حمدالله علي السلامة يا عبده – جيبت الايراد بتاع النهارده

·      عبد العال\ للللللللللللللللا

المعلم فجلة- لا يعني أيه لا ليه يا اخويا ماشتغلتش النهارده ولا ايه امال كنت فين النهارد . انطق .اتكلم

عبد العال \ اصل يا معلم فجلة الي حصل هوووووووووووااااااااااااااااا

فجلة\ ايه الي حصل ماتتكلم يا جدع انتا

"عبد العال" بلع -ريقه- وراح قاله بسرعه :

> التاكسي اتسرق < 

*يا نهار ابوك اسود_  نطق المعلم "فجلة" بالعبارة وراح رامي "الشيشة" وقام لعبد العال – علي فكرة المعلم فجلة قصير اوي لدرجة انه بالنسبة لعبدالعال زي "عقلة الاصبع" بس دا هو مش عياله طبعا "

المهم صرخ "فجلة" في وش "عبدالعال" الي الدم هرب من جسمه والعرق بيصب منه زي الانهار وحاول يشرح الي حصل للمعلم "فجلة" بس التاني مادهوش فرصة وقاله

·      أسمع ياراجل انت انتا تقب وتغطس وتجيبلي التاكسي بتاعي والا "رقبتك" حتطير انت سامع

"عبدالعال"\اجيبوه منين بس يامعلم  "جزرة" قصدي "فجلة"

فجلة \ وكمان بتنكت حضرتك؟

عبد العال\ بحاول افرفشك

فجلة\ تفرفشني لادا انا بقي الي حفرفشك – يا سرنجة . يا برشامة. يا بزازة . يا شماعة

عبدالعال\ أنت مخلف "صيدلية" ولا أيه؟

وفجأة الشمس غيمت وبقت "ليل" من الاربع "دواليب" الي دخله علي اخينا "عبده"

الي اتمسمر مكانه لما شفهم وبقي هو ألي  واقف امامهم زي "عقلة الاصبع"

ولاكن "عبد العال" صرخ فجاة وقالهم

·      اوعي حد يقربلي الي حايجي جانبي حمعلوه "كفته" انتوا سماعين ولا ؟

وفجاة زقهم "عبد العال" وطلع يجري

المعلم "فجلة" بص عليه وضحك وراح قال للدواليب الي واقفه " هاتوه يا عيال"

عارفين افلام "الهنود الحمر" لما يمسكوا حد غريب من الصيادين ويربطوه في جزع شجرة ويشيله اتنين مع بعض ويحطوه علي " النار" علي شان يشوه

هو ده الي حصل مع "عبد العال"

ياتري يا هالتري ايه الي هيحصل مع "عبد العال" سواق التاكسي وحيعمل فيه ايه المعلم "فجلة"

حتعرفوا كل ده في الحلقة القادمة انشاء الله تابعوني يوميا علي  مدونة
"قصص وروايات"
 http://kasses-w-rwayat.blogspot.com
وتابعونا علي صفحتنا عبر الفيسبوك
https://www.facebook.com/pages/%D9%82%D8%B5%D8%B5-%D9%88%D8%B1%D9%88%D8%A7%D9%8A%D8%A7%D8%AA-%D9%88%D9%83%D9%85%D8%A7%D9%86-%D8%AD%D9%83%D8%A7%D9%8A%D8%A7%D8%AA/1715092155383493 

المؤلف: اسماعيل محمد

مدون ومؤلف مصري -أعشق تأليف القصص والروايات

"رعب-مغامرات-اكشن-خيال علمي"

تابع القراءة